Braida Janett

Biographie

E puspè briglescha la retscha musicala dal Radio Rumantsch cun ina
novitad - Braida Janett è cun ses 17 onns la pli giuvna interpreta
ch’il Top Pop ha gì enfin uss. Ma la matta da Tschlin n’ha naginas
retegnientschas e chanta in frech «Schmetta cun quai!», en la
tunalitad da las giuvnas chantantas modernas dad ozendi. Senza però
tgittar sin models u idols da la scena - Braida è creschida si en in
vast mund musical, cun clavazin classic en scola e saxofon en la
musica da vischnanca, ses gusts van «da piz a chantun» e sia avertadad
è program. E perquai n’ha ella er nagin problem dad intunar ina
chanzun scritta sin mesira. La finala quinta la vusch - ina vusch
frestga e genuina!

Braida Janett, annada 1993, pendulescha tranter sia chasa paterna a
Tschlin (ses bab fa part dals famus Fränzlis) e ses lieu da scola a
Cuira, nua ch‘ella frequenta il gimnasi en terza classa. Ella n’ha anc
nagina finamira professiunala, ha però tschernì la musica sco accent
da ses studis.